Text Tanggomo

Dungohi lo mongobua

Dila bopolotutuwa

wala’o mangohuduwa

boli ma opupuluwa

Wanu wala’o modata

Yi’o mamali mohata

Hiyaluma tamasasa

Didu mowali pongata

Wala’o hibubuyuhuta

He’oduhenga muluka

Monga hebubuluhuta

Delo wala ilaluta

Hipoyitohe lohuta

Malo hipotatangguta

Putongi lali kanuta

Tilomata latondongo

Ati bo motohundongo

Wala’o hiyo-hiyongo

Biti-biti lo ombongo

Hemonga tutu lo bongo

Wala’o dipo yilonga

Ati mahe’opalonga

Bolo hi hiyo-hiyonga

Hi heheta lo nononga

Tilomato pongingiya

Malo uwito utiya

Tawuwewo hepongiliya

Malodidu o tuwiya

Wala’o mohunduwala

Mohata delo wadala

Longgu-longgu lo datala

Bolo hu’u himangala

Odito u ngohunduwa

Monga malo mohehuwa

Tilomato potubuwa

Kandho hi ayu-ayuwa

Tiilo wamba’o huto’o

Didu o potaliya bo’o

Motutu sambe toto’o

Dile bolo mindoto’o

Huyi ma huwo-huwo’o

Ilodata lo wala’o

Susa u hemo tonggala’o

U hedutolo lo wala’o

Bulo’o motihaya’o

Monga bo asali ma’o

Bolo tolambi epa’o

Awati tamo huhula

Lomaso ode depula

Lomodanda bilalula

Lo’otapu bendungula

Pilongala lo apula

Wala’o ma dudulamango

Hidutola pola-polango

Bo hehuliya liyamo

Dile malo mohuwango

Malo hata lo kowango

To daster anda-andango

Ati olo hiyaluma

Didu po’o piyohumo

To bo’o londu-londungo

O kotombe o alulungo

Bo lihu-lihu lo tungo

Susa u helodutolo

Lato pe’itunggi’olo

KB Po’o layitolo

Motutu berendiyolo

Openu bo duluwolo

Waw po’olawatolo

Tanggomo mayilapato

Asali malopatato

Donggo mohindu buwayi

Poli de pe’enda mayi

Wassalamu ‘alaikum warohmatullahi wabarokatuh